สู่ขวัญนักศึกษา
สว่าง ไชยสงค์ หมอพราหณ์สว่าง
ศรี ศรีมื้อนี้แม่นมื้องาม ยามนี้แม่นยามดี
อาทิตย์ไชยศรี สวัสดีลาโภ นโมพุทธายะ
ขอเดชเดชะเดโช องค์พุทโธ ธรรมโม สังโฆ ให้มาปกป้อง
คุ้มพี่คุ้มน้องมวลนักศึกษา
ให้มาคุ้มครองฮอดครูบาอาจารย์ผู้สอนสั่งพู้นเด้อ
เออ.. มื้อนี้ผู้ข้าหมอพราหมณ์สว่าง กะสิได้สู่ขวัญเอาชัย
ให้นักศึกษา ของวิทยาลัยศาสนศาสตร์เฉลิมพระเกียรติกาฬสินธุ์
มหาวิทยาลัยมหามกุฏราชวิทยาลัย ประจำปีการศึกษา 2553
จึ่งขออัญเชิญเทวาธิราชไท้ทุกนาม ทุกสวรรค์ชั้นฟ้า
ได้โปรดลงมาประทานพร และอำนวยอวยชัย
ให้พิธีเป็นไปด้วยความราบรื่น
ให้นักศึกษาสดชื่น รื่นรมย์สำราญ
ให้ครูบาอาจารย์มีจิตหาญกล้า
เป็นที่เพิ่งนักศึกษาทุกเมื่อทุกยาม…
เออ... นักศึกษาทั้งหลาย
บ่ว่าหญิงหรือชายกะได้มาพรั่งพร้อม
เจ้าได้มานั่งล้อมอ้อมอยู่พาขวัญ
เฮ็ดไปตามสมควรสู่ขวัญน้องใหม่
พวกรุ่นพี่เจ้ากะเอาใจใส่ซ่อยประคับประครอง
ขอให้พวกเจ้าทั้งผองมีแต่ความจำเริญ
อย่าสู่ได้เคอะเขิน ยามมาเรียนรู้
ขอให้เป็นผู้ฮู้ในศีลในธรรม
ฮู้จักเป็นผู้นำผู้ตามถูกต้อง
เคารพความเป็นรุ่นพี่รุ่นน้อง เพื่อนนักศึกษา
อู้ครูบาอาจารย์ผู้หลักผู้ใหญ่
อู้การมาการไปมีทรงมีวาด
สมกับเป็นนักปราชญ์ เรียนศาสนา
ฮู้พุทโธ พุทธา พุทธัง พุทธะ
ฮู้จักธรรมมะ ธรรมโม ธรรมมัง
ฮู้จักสังฆัง สังโฆ สังฆะ
ยึดเป็นสรณะ สมปัญญาชน
เจ้าอย่าย่างนำคนตดเหม็นท้องยื่ง
เขาสิตดใส่เจ้าให้ดังเว่อปึ่งเหม็น
ของบ่อเป็นตาจ้ำ อย่าสู่จุ่มมือลง
ของบ่เป็นตากัดอย่ากินสิพวนท้อง
ของบ่เป็นตาส้มอย่างมกินสิขมปาก
มันสิยากแก่ท้อง เที่ยวขี้ยังคืน
เออ...คำโบราณเพิ่นว่า คันแนวใด๋มันยาก
กะให้ค่อยคึดค่อยแก้ ค่อแก่ค่อยดึง
ให้ค่อยขุดค่อยขนค่อยคนค่อยค้ำ
ให้ค่อยทำการสร้างอย่าวางใจให้ฟ่าวแล่น
ให้ค่อยอดค่อยแง้นมันสิได้ต่อนคำ
เจ้าอย่าได้ล่วงล้ำ เฮ็ดสิ่งบ่ดี
เรียนระดับปริญญาตรี ปริญญาโท ปริญญาเอก
อย่าสู่ไปหลงเลขหลงหวยหลงเบอร์
เจ้าอย่าสู่ไปพลั้งเผลอนำแนวบ่แม่น
อันใด๋เป็นกระพี้ อันใด๋เป็นแก่น กะต้องฮู้เท่าทัน
เจ้าต้องขยันขันเกลียวเข้าไว้
ให้เจ้าเอาใจใส่การสูตรการเรียน
ให้เจ้าอ่านเจ้าเขียนศึกษาค้นคว้า
เจ้าอย่าลืมว่า ... ปมาโท มัจจุโนปทัง คือว่าความประมาทย่อมนำไปสู่ความตาย
กัลยา ณ การี กัลยาณัง ปาปการี จะปาปกัง หมายความว่า ทำดีได้ดี ทำชั่วได้ชั่ว
ดังนั้น เจ้าอย่าได้ทำความชั่วให้ทำแต่ความดี
ให้พวกเจ้าสามัคคีกลมเกลียวกันไว้
ยกระดับมหาวิทยาลัยของเฮา ให้ชื่อเสียงสูงส่ง
อย่าเป็นคนหยิบโหย่ง ให้มีคุณธรรม
จบออกไปแล้วต้องกล้าเป็นผู้นำสังคมเขาได้
หรือพร้อมเข้ารับใช้สังคม องค์กร
นี่บ่แม่นหมอพราหมณ์สอนแต่เป็นคำแนะนำ
นักศึกษาทั้งหลาย ให้เจ้าจดเจ้าจำคิดนำไปใช้
แล้วพวกเจ้าสิได้จำเริญจำเริญ…
เออ...บัดนี้หมอพราหมณ์กะสิขอเชิญพวกเจ้าทั้งหลาย
พากันฮ้องเอาขวัญ ... ว่ามาเด้อขวัญเอ้ย
ขวัญอยู่แข่งกะให้เจ้ามาลีลาลีลา
ขวัญอยู่ขากะให้เจ้ามาลีล่ายลีล่าย
ขวัญอยู่บั้นท้าย ขวัญอยู่แขนขวาแขนซ้าย กะให้มาเต้ามาโฮม
ทั้งขวัญนมขวัญคางขวัญเอวบางท้องกิ่ว
ทั้งขวัญคิ้วและขวัญตา
ขวัญกายางามดี กะให้เจ้ามาเสียมื้อนี้วันนี้ ...ว่ามาเด้อขวัญเอ้ย
ขวัญไปฮ้องเพลงคาราโอเกะ
ขวัญไปเที่ยวพลาซ่า ขวัญไปเลาะซื้อสินค้าอยู่ที่คลองถม
กะว่ามาเสียมื้อนี้วันนี้ ...ว่ามาเด้อขวัญเอ้ย
ขวัญเจ้าโดดเรียนหนีก่อนเวลา หนีไปหาเสริมสวย กะว่ามาเสียมื้อนี้วันนี้
ขวัญเจ้ามาสายบ่ทันหมู่
ขวัญเจ้าอดหลับอดนอนมัวแต่เบิ่งบอลโลก
กะว่ามาเสียมื้อนี้วันนี้ ...ว่ามาเด้อขวัญเอย
ขวัญหนีไปม่วนอยู่แถวใด๋ กะให้มาไวไว
มาหามาสู่ ให้เจ้ารีบมาอยู่ในเนื้อในคีง
มาค้นหาความจริงมาเฮียนมาฮู้ มาเป็นผู้รอบรู้ทั้งทางโลกทางธรรม
หมอพราหมณ์จึ่งขอเชิญพวกเฮาพากันฮ้องน่ำน่ำ น่ำน่ำ น่ำน่ำ.ว่ามาเด้อขวัญเอ้ย
เออ...ครั้นขวัญมาแล้วหมอพราหมณ์สว่าง กะสิแถมพร
สิทธิการิยะ ตถาคโต สิทธิลาโภ นิรันตรัง สิทธิเตโช ชโยนิจจัง
ขอให้พวกเจ้าทั้งหลาย จงมีโชคลาภตลอดไป และมีเดชมีชัยตลอดกาล
เงินกะให้ไหลกอง ทองไหลมา เพชรนิลจินดากะให้ไหลสู่
โชคและลาภไหลเข้าทั้งเช้าและแลง ไปทางหน้ากะอย่าให้มีคนซัง
ไปทางหลังกะให้มีคนย้อง ญาติพี่น้องนับหน้าถือตา
มีอำนาจวาสนาลื่นล้นคนย้องทั่วเมือง นอนหลับให้เจ้าได้เงินพัน
นอนฝันกะให้เจ้าได้เงินหมื่น นอนตื่นกะให้เจ้าได้เงินแสน
แบนมือไปให้ได้เงินล้าน เงินทองไหลเข้าบ้านรวยล้นเป็นเศรษฐี
สอบแต่ละปี แต่ละภาคการศึกษา อย่ามี F มี I
ให้เจ้าได้ A ล้วนล้วนครวญค่าแก่ทุกคนเด้อ
ไชยตุภวังค์ ไชยมังคลัง ก็ข้าเทอญ
นะโมพุทธายะ นะมะพะทะ จะพะกะสะ นะมะอะอุ สาธุ สาธุ สาธุ.
............................
พ่อพราหมณ์ สว่าง ไชยสงค์ / เรียบเรียงและเจ้าพิธี
วันที่ 11 ก.ค. 2553 แรม 15 ค่ำ เดือน 8
/ โทร 0833556132
เยี่ยมมาก