สู่ขวัญครูเกษียณ

สุขสันต์วันเกษียณ

ศรี ศรี มื้อนี้แม่นมื้อศุภวาระดีถี มหาสิริสวัสดิ์พิพัฒนมงคล สมบูรณ์พูนผลด้วยลาภยศสรรเสริญ จำเริญด้วยคุณวิเศษอุดมเดชเดชาชัย พุธเกรียงไกรที่ยี่สิบหกเดือนกันยายน พุทธศักราชสองพันห้าร้อยห้าสิบห้าขึ้นสิบสองค่ำเดือนสิบแม่นปีมะโรง เพิ่นให้ผู้ข้า ครูสว่าง ไชยสงค์ สู่ขวัญเพื่อความเป็นศิริมงคลตลอดเป็นขวัญและกำลังใจให้ผู้อาวุโสทั้งหก ซึ่งตกปีเกษียณเปลี่ยนวิถีชีวิตใหม่ ท่าน ผอ. สมชาย เชาว์พานิช เป็นประธาน คุณครูอาจารย์เหมิดโรงเรียนอนุกูลนารีให้ความร่วมมือร่วมไม้ ผู้มีเกียรติไกลใกล้เฮาได้เชิญมา ทั้งป้าลุงอาวอามากมายหลายส่ำ ได้มาแลหลิงล่ำเป็นเกียรติเหลือหลาย แล้วบัดนี้ขันหมากเบ็งขันใหญ่กะตั้งไว้ตรงกลาง ครูสว่างเป็นพ่อพราหมณ์มื้อนี้ ประกอบพิธีไปตามคลองฮีตเค้า ผู้ข้าขออัญเชิญคุณพระพุทธเจ้า พระธรรม พระสงฆ์ อีกขออัญเชิญอินทร์องค์เทพเทิงชั้นฟ้า ขอจงได้โปรดเสด็จลงมารักษาเอาไว้ ให้ ท่านผู้อาวุโสทั้งหก ซึ่งประกอบไปด้วย คุณครูบุญเลิศ บุญไชยโย กลุ่มสาระการเรียนรู้ภาษาไทย คุณครูดวงจันทร์ พรพลทอง กลุ่มสาระการเรียนรู้ภาษาไทย คุณครูบุญเหลือ เคนวิเศษ กลุ่มสาระการเรียนรู้สังคมศึกษา ศาสนา และวัฒนธรรม คุณครูกมล โตอ่อน กลุ่มสาระการเรียนรู้สุขศึกษาและพละศึกษา คุณครูมยุรี เพิ่มศิลป์ กลุ่มสาระการเรียนรู้สุขศึกษาและพละศึกษา พร้อมกับนักการบรรจง ฉายถวิล ซึ่งเป็นนักการดีเด่น ที่เฮ็ดถูกต้องนั่งล้อมอ้อมอยู่พาขวัญ ขอให้สุขสันต์หรรษาสูงส่ง เฮ็ดอีหยังกะให้ไหลโล่งสมปรารถนา เงินไหลนองทองไหลมาปัญญาเลิศแล้ว ขอให้ใสคือแก้วหน่วยวิเศษดวงงาม คนหลายหลามยกยอปอปั้น ให้ความดีของท่านที่เคยได้ทำมา เป็นปัจจัยนำพาหรรษาสุขยิ่ง ขอให้พบแต่สิ่งที่เป็นมงคล คุณครูบุญเลิศกะให้ประสบผลมั่งมีหลายชั้น รถยนต์คันใหม่ว่านั้นกะให้โชคให้หมาน ให้มีตุ๊กตาหน้าหวาน ๆ นวล ๆ ขาว ๆ อ่อน ๆ ที่เป็นตาสะออนนั่งเฮียงเคียงคู่ อย่าได้เหงาหดหู่ยามอยู่หลังพวงมาลัย สุขภาพกายใจให้เจริญเพลินเพลิด ให้คุณครูบุญเลิศจงไชยโย ๆ ส่วนคุณครูดวงจันทร์ กะให้สุโขขายของไปเรื่อย ๆ ความหนักเหนื่อยเจ้าอย่าสู่มี ได้กำไรดี ๆ ไหลมาอย่าขาด บุญที่เคยสร้างชาติสอนสั่งนักเรียน พอถึงวัยเกษียณให้ โย ๆ ยิ่ง ๆ ให้ท่านพบแต่สิ่งดีเลิศมงคล ส่วนคุณครูกมล คนเมืองสิงห์จริงแท้ ให้โรคภัยพ่ายแพ้หายขาดจากกาย สรรพเคราะห์ทั้งหลายให้หนีหายไกลห่าง สรรภัยต่าง ๆ ให้หนีห่างไกลสูญ ให้ท่านสุขสมบูรณณ์เป็นฮ่มโพฮ่มแก้ว เป็นผู้งามเลิศแล้วในวัยเกษียณ ครูทั้งเหมิดโรงเรียนยังคิดนำเป็นห่วง กาลเวลาข้ามล่วงให้อยู่ดีมีแฮง ให้แข็งแรงทุกเมื่อ ส่วนคุณครูบุญเหลือ เจ้าของสวนยางพารา ใกล้สะพานเทพสุดาซื่อว่าสวนอิ่มอุ่น ครันไผอยากอบอุ่นเชิญไปแวไปยาม บ้านไม้แดงหลังงามเตรียมไว้พร้อมแล้ว ใสพอปานดวงแก้วอิ่มอุ่นอีหลี ขอให้คุณครูนั้นมีแต่ความสุขสันต์หรรษาเติมต่อ บุญกุศลเคยก่อพาเด็กน้อยอ่านเขียน เคยพานักเรียนศึกษาค้นคว้า ขอให้กลับนำพาพบชัยมีโชค สรรพเคราะห์ สรรพโศก ขอให้จากสูญหาย สรรพโรคสรรพภัยขอให้หนีไกลห่าง ขอให้พบแต่แสงสว่าง ในชีวิตหลังเกษียณ ส่วนคุณครูมยุรีกะส่ำแม่นักเรียน เพียรทำงานดีแล้ว บ่มีแมงมีแป้ว แล้วเลิศทุกประการ ยามเวลาทำงานบ่มียานมีหย่อน ย้อนเฮ็ดดีมาก่อนไผกะย้องสรรเสริญ ขอให้ท่านจำเริญสุขกายใจแท้ อย่าได้เฒ่าอย่าได้แก่ให้ส่ำนี้ตลอดไป ส่วนนักการบรรจง กะยังคงความหมายเป็นนักการชั้นเยี่ยม บริการเต็มเปี่ยมเต็มที่เต็มเวลา รถคันใดไปมาจำเสียงกะได้ เลขทะเบียนจำไว้ได้เหมิดทุกคัน เพิ่นเป็นคนขยันขอสรรเสริญไว้ตรงนี้ เกษียณแล้วจั่งซี้ขอให้จำเริญ ๆ เออ... บัดนี้หมอพราหมณ์กะสิเอิ้นเอาขวัญเจ้าทั้งหลายให้มาอยู่ในเนื้อในกาย ครันขวัญเจ้าหนีไปเที่ยวเล่นทางใด๋ ทางใกล้หรือไกล กะให้มาไวไว มาหามาสู่ให้มาอยู่ในเนื้อในคีง แล้วให้มาเสียมื้อนี้วันนี้ว่ามาเด้อขวัญเอ้ย, ขวัญแข้งกะให้มาอยู่แข้งลีลา ๆ ขวัญขากะให้มาอยู่ขาลีล่าย ๆ ขวัญแขนขวาแขนซ้ายกะให้มาเต้ามาโฮม ขวัญผมและขวัญคาง รวมตลอดสามสิบสองอย่างให้มาเสียมื้อนี้วันนี้ ว่ามาเด้อขวัญเอ้ย, ขวัญเจ้าไปทางเหนือทางใต้ไปไทยทางล่าง ขวัญเจ้าไปเที่ยวห้างบิ๊กซีโลตัส เลาะลัดไปไกลถึงเมืองนอกต่างถิ่น ไปฮอดเมืองจีน กัมพูชา มาเลเซีย ออสเตรเลีย เกาหลีใต้ ไปนิวซีแลนด์ เข้าแดนสิงคโปร โงมาเวียดนาม ตามไปฮอดลาว เข้าเขตพม่าขวัญเจ้าอย่าช้า ให้กลับมาไว ๆ ให้มาเสียมื้อนี้วันนี้ ว่ามาเด้อขวัญเอ้ย, บัดนี้ขวัญเจ้าเกษียณอายุราชการแล้ว ชีวิตงามคือแก้วแล้วเลิศทุกประการ ให้กลับมาสำราญ ญาติพี่น้องคอยอยู่ ให้มาหามาสู่ให้มาสุขนำกัน ให้กลับมาเร็วพลัน มาเสียมื้อนี้ วันนี้ ว่ามาเด้อขวัญเอ้ย ครันขวัญเจ้ามาฮอดมาถึงอยู่ในเนื้อในคีงดีแล้ว หมอพราหมณ์กะสิแถมพร...
สิทฺธิการิยตถาคโต สิทฺธิลาโภ นิรนฺตรํ สิทฺธิเตโช ชโยนิจฺจํ ขอให้มีโชคลาภตลอดไป และมีเดชมีชัยตลอดกาล พร้อมทั้งสุขีหมั่นอนันต์นองทองแท่ง ไปทางใด๋รับแต่แบ็งก์แดงม่วงและเทา คำว่าราศีเศร้าซึมเซาให้ไกลห่าง เฮ็ดอีหยังกะตามซ่างขอให้ลุลาภได้ตามคาดและหวัง เมื่อทำการแต่ละครั้งเชิญดวงแก้วทั้งสาม ตามปกปักรักษาอย่าสู่มีมารฮ้าย ให้ซำบายหาย ฮ้อนมโนในใสสว่าง ขอให้โชคเข้าข้างเทพดาเจ้ารักษา ขอให้รวยล้นฟ้าลาภไหลมาอย่าหยุดหย่อน ขออวยพรส่ำนี้ดีแล้วให้รับเอาไชยตุภวังค์ ไชยมังคลัง ก็ข้าเทอญ ฯ. นะ โม พุท ธา ยะ นะ มะ พะ ทะ จะ พะ กะ สะ นะ มะ อะ อุ. พราหมณ์สว่าง ไชยสงค์ / ประพันธ์และประกอบพิธีการสู่ขวัญ 26 กันย์ 55