ประวัติวันลอยกระทง
เหลียวเห็นจันทร์เพ็ญแจ้ง จรัสแสงใสส่อง
เดือนสิบสองมาฮอดแล้ว แถมท้ายถ่ายฤดู
หัวลมหนาวพัดยู้ อยากมีคู่มาควงแขน
อยากมีแฟนมาเดินเคียง เที่ยวงานคืนนี้
ลอยกระทงปีนี้ ประเพณีฮีตเก่า
พวกหมู่เฮาพี่น้อง รักษาไว้บ่ลืม
เฮานี้แสนปลาบปลื้ม ดูดดื่มกับของดี
บอกศักดิ์ศรีความเป็นไทย ใหญ่งามเพียงฟ้า
เฮาเฮ็ดมาโดนแล้ว ทางเมืองแจวพวกฝรั่ง
เขากะหลั่งมายกย้อง กระทงแท้ว่างาม
พ่อขุนรามเฮาเริ่มไว้ สุโขทัยเคยสูงส่ง
ลอยกระทงลงสู่น้ำ งามแท้ลื่นคน
นพมาศตั้งต้นเป็น คนเฮ็ดทูลถวาย
ทั่วแดนดินสุโขทัย ซาลืองามแท้
ยามเมื่อแลดูแล้ว แสนสะออนซมซื่น
กระทงงามลื่นล้น คนย้องอยู่บ่เซา
นพมาศเลยเป็นเจ้า องค์เอกนางสนม
คนนิยมสมพร ต่อมาถึงวันนี้
หลานจั่งขอไขซี้ แถลงแจงแจ้งข่าว
บอกหมู่ซาวพี่น้อง ที่มาเล่นเที่ยวงาน
ลอยกระทงเด้อท่าน อธิษฐานให้มั่นแก่น
ลอยความทุกข์ยากแค้น หนีถิ่มให้ห่างหาย
ลอยความทุกข์ยากฮ้าย ให้หายห่างอย่ามาเห็น
อย่าได้มีกรรมเวร สิ่งใด๋มากลายต้อง
ขอขมาเถิงท้อง ย่านนทีแม่น้ำใหญ่
ที่เคยกินอาบใช้ บูชาไว้หมอบขมา
ฝูงโรคาพยาธิฮ้าย อันตรายให้ไกลห่าง
สุกสว่างส่ำฟ้า งามแจ้งส่ำพระจันทร์
อีกเงินทองว่านั้น ให้แน่นอั่งเต็มกระเป๋า
อย่าได้เซาทางไหล หลั่งมาคือน้ำ
แนวใด๋งามให้ขอไว้ สิเป็นไปคักแน่
แม่คงคาเพิ่นให้โซค กระทงน้อยกะให้พร
หลานขอจบกลอนไว้ อยู่ในนามวัดสว่าง
ปรารถนาทุกอย่าง ขอให้ได้เลิศล้น ทุกคนแท้...ท่านผู้ฟัง ๆ
สว่าง ไชยสงค์ / ประพันธ์
ม่วนหลายค่ะ