นิทานที่ 9 นางปิสุนา

 

 

จักกล่าว งามหยาดย้อย      หญิงชื่อปิสุนา ก่อนแล้ว

     เป็นสาวสนม                 แห่งพระยาเมืองกว้าง

เช้าค่ำ ปัวละบัดเจ้า            ขัดสีอุปัฏฐาก

     คอยฮับใช้                   ในท้องราชวัง

 

วันหนึ่ง ตอนบีบคั้น             นวดข้อไขมัน

     พระยาเลยถาม             เลดลวงหาฮู้

นางเอย คนในห้อง             วังทอง มีใผแด่

สาโหด คิดถ่อยฮ้าย            ปองฆ่าฮอดกู ฮู้บ่?

 

ปิสุนา อ่อนน้อม                 ขอโผดชีวี พระเอย

เฮียมหาก เห็นมัดไฟ          เปล่งแปวเป็นฮ้า*

     ขืนเผยข้อ                   คอเฮียมสิหลุดขาด

พระยา อนุญาตให้             นางเว้ากล่าวแถลง

 

ข้าน้อย หลอนลักฮู้             มหาราชเทวี

ลักลอบ เฮียนมนต์ยำ         เกิดกลายเป็นเป้า

      ผีโพงฮ้าย                  หากินยามค่ำ

จกเข้า ทางดากก้น            กินไส้หลากหลาย มาแล้ว

 

ปิสุนา กล่าวแล้ว                 ลาจากเตียงพระยา

     ไปหาโฮง                     แห่งเทวีเจ้า

สับซึ่ม ไขคำน้อย               เทวีคอยผ่อ

ลูกนี้ ฮักแม่ล้น                   ทนไว้บ่ไหว แม่เอย

 

อันว่า พระยามิ่งเจ้า            ออกดากมาดน

     เป็นโรคา                     ยากสิปัวดีได้

     ยามเฮียมคั้น                ซูนมือเป็นหน่อ

ขอแม่ ลองลูบก้น               สิเห็นฮู้ดากพระยา แน่แล้ว

 

ตกค่ำ พระยาแว่เข้า           โฮงราซเทวี

     บรรเลงกาม                 เสพสมเซยซ้อน

     มเหสีคล้อย                  คาใจจึงลูบดาก

พระยา ซากดาบกล้า          แทงฆ่าว่าแม่นโพง

 

นิทานธรรม กล่าวชี้           ฮอยฮูบ มือที่สาม

สับซ่อ ยอบันหา                ครอบครัววายวุ่น

สังคม สับสนหยุ้ง               สามัคคีเลยแตก

ชาติพัง พินาศย้อน            อุบายซ้อนจอบออย* แท้แล้ว

(25 สิงหา 2010)

* ฮ้า - ใหญ่ มาก  ไฟกองใหญ่ เรียกว่า กองไฟฮ้า

* จอบออย (ลาว) - ประจบประแจง

[โสภณ เปียสนิท]

มาอ่านนิทานเก่าครับ

[นีนาถ]

ขอบคุณค่ะ วันหน้าแวะเข้ามาอ่านเรื่องใหม่อีกนะคะ

[ชายเล็ก]

มาอ่านครั้งแรก (อ่านเถื่อตำอิด พะนะ)

[นีนาถ]

ขอบคุณหลายๆเด้อชายเล็ก...ที่แวะเข้ามาอ่าน...นีนาถคาดว่าคงสิบ่แม่นเทื่อสดุดท้ายดอกเน๊าะ

มื้อหน้าและเข้ามายามกันอีกเด้อ...

ฮักแพง