คำผูกแขน (สำนวนลาวจำปาสัก)

ตอนไปเที่ยวลาวแม่เฒ่าผูกแขนให้เลยบันทึกเสียงแล้วถอดเทปมาเล่าให้ฟัง

คำผูกแขน  (สำนวนลาวจำปาสัก)

ฮ้ายกวาดหนี ๆ   ดีกวาดเข้า ๆ  ผูกแขนซ้ายให้ขวัญมา  ผูกแขนขวาให้ขวัญอยู่  สามสิบสองขวัญแลนมาเต้า  เก้าสิบสองขวัญแลนมาโฮม   พุทโธสิทธิเดช  ธัมโมสิทธิเดช   สังโฆสิทธิเดช  ฝ้ายเส้นนี้เป็นฝ้ายศิกดิ์สิทธิ์  องค์พุทโธผู้มีฤทธิ์ทอดประทานมาให้  ขอเจ้ามีสิริสวัสดีผาบแพ้ฝูงหมู่พระยามารอย่าได้มีอันมาพานบังเบียด  ให้เจ้าคมดังพร้าให้เจ้ากล้าดังหิน  ให้เจ้ามีทรัพย์สินหลาย ๆ ให้เจ้ามีแต่ได้อย่ามีเสีย   พ่อสิแถมพรให้มีชัยสิทธิโชคให้เจ้าลุราชร้ายสมแม้งปรารถนา  ทุกค่ำเช้าให้สมภาพพออก  สุขอยู่ในราตรีคอยสบายเบาเนื้อ  ยามนิ่งนอนในห้องสวรรค์ภัยให้พ้นโศกให้เจ้าได้ก่อเกื้อซูส้วนศาสนา   โรคาไข้หวัดไอให้เหินห่าง  เจ็บหลังทั้งปวดท้องเหน็บแข้งเข่าขา  อย่ามีแนวขัดข้องแนวใดก็ให้ผ่าน  คือดังคำผู้เว้าใสเหลื่อมฮุ่งเฮือง   เยาเมื่อเจ้ายางย้ายเดินถิ่นทางไกล  อย่าได้มีภัยพาลยากแคลนคั่งฮ้อน  ถ้าลงทุนไปค้าให้กำไรมีมาก  ลงทุนเทือละน้อยกำไรนั้นให้ได้หลาย อายุ  วัณโณ  สุขขัง  พลัง   อายุนี้ให้เจ้ายืนยาวมั่นพันปีอย่าขูล่วง  วรรณใสดังแก้วยืนมั่นพันวสา  สุขขังนี้ให้เจ้าสุขลื่นล้นเกินคนในโลก  พลังให้พลังแฮงดังซ้างสารกล้าแสนตัว อุ  อะ  มุ  มะ  มูล  มา  กินอย่าบกจกอย่าลง  ทานมื้อเซ้าให้ไหลเข้ามื้อแลง   เงินไหลนองทองไหลมาเด้อ  นอนหลับให้เจ้าได้เงินพัน  นอนฝันให้เจ้าได้เงินหมื่น  นอนตื่นให้เจ้าได้เงินแสน   แปนมือให้ได้แก้วมณีโชติ  โทษฮ้ายอย่ามาพาลภัยฮ้ายอย่ามาเบียด  หมั่นยืน  หมั่นยืน

           

ขอบคุณครับผมหามานานแล้ว

[สายคำ]

ขอบคุณมากๆครับ หามานานแล้วเหมือนกัน

[แจ้น]

ขอบคุณครับที่เอามาแบ่งมาปัน สิพยายามท่องให้ได้ครับ