สายแนนพรหมลิขิต กลอนอ่านอีสาน (ลายกลอนลำ)

           สายแนนพรหมลิขิต

    (กลอนอ่าน # 67 “ลายกลอนลำ”)

   ^๑ ย้อนพรหม    ลิขิตน้าว        นำจ่องสองใจ
   มาให้            ตาประสบ        พบกันจนได้
   แสนไกล       หนคนก้ำ         พรหมดลบันดาลซ่อย
   ดั่งข้อย         มาฮักเจ้า         เฮาได้ฮ่วมทาง  กันนอ

   ^๒ บ้อยว่า      เป็นคู่สร้าง        เทียมพ่างปรางเขนย
   บุญเฮา        คงเคยเฮ็ด        ฮ่วมกันมานั้น
   แฮกเห็น      ใจหมายหมั้น     ในสายตาเซื่อว่า
   คาดได้         มาพบพ้อ         แนนเนื้อคู่กัน  จริงแล้ว

   ^๓ เพิ่นว่า       คันบ่เป็นคู่แท้    เถิงฮักปานใด
   ยากสิ           สมหัวใจ          เภทภัยพานล้ม
   เคราะห์ขม    ระทมฮ้าง         หมางเมินเดินห่าง
   สุดสาย        ทางต่างเส้น      เป็นฮ้ายพ่ายกรรม  นั้นนอ

   ^๔ จึ่งเฮา       คงคู่ค้ำ            นำเนื่องสายแนน  แท้แล้ว
   แถนพรหม     พามาหา          ฮ่วมซีวาสร้าง
   ตั้งแต่          หันเห็นหน้า      สายตาประสานคัก
   ฮักแฮก        เฮาฮุ่งฮู้           เป็นเนื้อคู่สุขสม  จริงแล้ว

   ^๕ นี้แม่น       พรหมลิขิตยู้      ยูส่งบันดาล
   สายแนน      บุญสมภาร       จ่องดวงมานไว้
   ให้คน          เป็นคู่สร้าง        สายทางซีวิต
   บ่ผิด           ไปจากเจ้า        แลข้อยคู่กัน  นี้แล้ว

          ชาตรี เสงี่ยมวงศ์   17 ธันวาคม 2561

ศัพท์ลาวอีสาน 
๑. ย้อน : เพราะว่า. น้าว, จ่อง : ดึง, เหนี่ยว. ก้ำ : ด้าน, ทิศ.  ซ่อย : ช่วย

๒. บ้อยว่า : เมื่อ,  พลันที่.   เทียมพ่าง : เคียงคู่.  แฮก : แรก.  พ้อ : พบ.

๓. คัน : หาก. เถิง : ถึง.

๔.  สายแนน :สายใยข้ามภพชาติให้เนื้อคู่มาพบกัน. แถน : เทพ.   คัก : จริง, ใช่, ชัดเจน.   ฮุ่งฮู้ : รู้ชัด.

๕. ยู้ : ผลัก, ดัน.  ยู : สบายใจ.   สมภาร : ผลบุญ

สายแนน พรหมลิขิต

[พิมล มองจันทร์]

สังมาหวานแซบซ้อยฟังแล้วมวนหู แท้น้อ