คำวิดฟายหลังสู่ขวัญ

คำวิดฟายหลังสู่ขวัญ

สว่าง  ไชยสงค์

 

 คำวิดฟาย คือ คำกล่าวหลังจากสู่ขวัญเสร็จแล้ว ซึ่งพ่อพราหมณ์จะเอาน้ำใส่แก้ว จากนั้นจะใช้ดอกไม้จุ่มแล้วซิด(สลัด) ไปยังผู้ที่เข้าร่วมพิธีสู่ขวัญ นัยว่าให้อยู่ดีมีแฮง นั่นเอง

 

                 สาธุ สาธุ สาธุเด้อ

น้ำนี้แมนอุทธกังวิเศษสามารถปัดเหตุฮ้อนหายจ้อยบ่อเหลือ

ซิดไปเหนือซิดไปใต้ซิดไปไทยทางล่าง

เฮ็ดให้ใสสว่างแจ้งเห็นฮู้ป่องธรรม

ไผผู้มีกรรมฮ้ายบ่ซำบายหายสร่วง

เคยเจ็บหน่วงปวดร้าวคราวนี้กะสิหาย

                น้ำวิดฟายแก้วนี้พระมุนีจอมปราชญ์

ศาสดาเอกแก้วประทานแล้วจั่งซิดไป

ฝูงหมู่เทพท่อนไท้กะพากันเสริมส่ง

อินทร์อยู่ขงเขตแคว้นแถนไท้กะย้องยอ

ข้าจักขอซิดให้ไทยซุมเฮาน้องพี่

ให้อยู่ดีทั่วหน้าสุขล้นซู่คน

แม่นสิไปหนห้องทางใด๋อย่าเขินขาด

ให้อำนาจล้นฟ้ารวยล้นซู่ยาม

ให้ภูตผีขามย่านเกรงเดชบารมี

ให้ราศีสดใสใหม่งามส่ำจันทร์แจ้ง

ยามมื้อแลงยามมื้อเซ้าให้เว้านัวหัวม่วน

ให้เจ้าสุขล้วนล้วนมีเงินล้านตื่มแถม

                ข้าจักซิดน้ำนี้ให้ฟ้งไปทั้งแปดทิศ

ถืกคนหิดกลากเกลื้อนหายจ้อยเกลี้ยงใส

ถืกคนไข้ไอจามปวดป่วง

กะให้หายสร่วงซ้ำมีแฮงฟิ้นสร่วงเซา

ฟ้งไปถืกผู้เฒ่าผมขาวแข่วหล่อน

กะให้กลับหนุ่มแน่นสองเต้าเต่งตึง

ฟ้งไปถืกเด็กน้อยกะให้หนุ่มเป็นสาว

ฟ้งไปถืกผู้สาวกะให้งามคือนางฟ้า

อย่าได้มีไฝฝ้าให้ผิวพรรณใสส่อง

ให้เจ้าเหลื่อมม่องม่องผู้บ่าวย้องทั่วเมือง

                คันแม่นฟ้งไปถืกครูน้อยกะให้เป็น ผอ.

ให้ได้ คศ. สามตามมาอย่ามัวช้า

คศ. สี่ คศ. ห้าตามมาโดยด่วน

พอสมควรกะให้ได้ถ้วนหน้าซู่คน

                ฟ้งไปถืกผู้ช่อยกะให้เป็นพ่อผู้ใหญ่

ฟ้งไปถืกพ่อผู้ใหญ่กะให้เป็นพ่อกำนัน

ฟ้งไปถืกนายพันกะให้เป็นนายพล

ฟ้งไปถืกนายอำเภอกะให้เป็นผู้ว่า

ฟ้งไปถืกพ่อค้ากะให้มีกำไร

ฟ้งไปถืกผู้ใด๋กะให้ฮุ่งเฮืองเด้ออีพ่อ

ฟ้งไปถืก ส.ส. กะให้เป็นรัฐมนตรี

ฟ้งไปถืกรัฐมนตรีกะให้เป็นนายก

อย่ามีตกต่ำต้อยคอยคุ้มหมู่ประชา

ให้สุขสันต์ทั่วหน้าเด้อซุมเฮาน้องพี่

ขอวิดฟายส่ำนี้ ยาท่านจงเจริญเด้อ

ไชยตุภวังค์  ไชยมังคลัง ก็ข้าเทอญ สาธุ สาธุ สาธุ

[เลิศฤทธิ์]

สวัสดีครับ..วัฒนธรรมอีสานงามล้นเหลือ

วัฒนธรรมสู่ขวัญเหมืองฝาย.ให้ความหมายต่อสิ่งแวดล้อม

อ่อนน้อมต่อธรรมชาติ องอาจในพิธีกรรม คารวะพญาแถน

ขอให้อยู่ดีมีสุขทุก ๆ มื้อเด้อ

[สว่างชัย มหาเปรียญธรรม]

ท่านเลิศฤทธิ์ และ ท่านรอง ผอ. ผมขอขอบคุณครับ รหัสผ่านซุปเปอร์ยาก ดูไม่ค่อยออกเลยท่านรอง