รวมงาน ค่าว เก่าๆ

รวมค่าว

........

สุราน้ำเหล้า นั้นเล้าเสียหาย กิ๋นนักเนอนาย อาจต๋ายขว้ำหน้า

กิ๋นแล้วเหมือนผี ไล่ตี๋บุบฆ่า ใจ๋หิ้นโก๋ธา ต๊าฮบ

กิ๋นเหล้าเมาสึง ไผตึงบ่คบ จุดจบคือเหล้า ลงแดง

กิ๋นนักล้ำฮ้าย จ่างต๋ายตับแข็ง กิ๋นมอกมีแฮง ขอสักเกิ่งแก้ว

9 มิ.ย.54

.......

“โกวเล้ง”กล่าวไว้ ในวรรณก๋รรม สุราใจ่ลำ ตี่รสชาติเหล้า

ที่ข้ามักหมาย สหายหนุ่มเฒ่า บรรยากาศเมา มิ่งมิตร

ร่ายร่ำต๋ำจอก สำรอกความคิด ยกจิตสู่ขั้น มรรคา

เมรัยจอกนี้ มีไว้ใฝ่หา เชื่อมสื่อวิญญา ปรัชญาวงเหล้า

เฉกเช่นข้า...หนาน...9 มิ.ย.54

..........

ถ้าหูมฅ่าวจ้อย นักหน้อยผ่านต๋า Lookแล้วอย่าลา Likeมาบอกหื้อ

ถ้าLoveไฉน ผ่านไปบ่ยื้อ ฅ่าวจ้อยมันคือ กำคล้อง

กวีเมืองเหนือ ฅ่าวเครือกำพ้อง ถ้าถูกใจ๋ต้อง Likeมา

ถ้า Look Like Love อย่าLoveแต่ต๋า I wait you มา อ่านฅ่าวหนานหน้อย

9 มิ.ย.54

 .......

“ศรีทวน สอนน้อย” พ่อสร้อยครูหนอ ฅ่าวจ้อยครูซอ ลาหอแห่งห้อง

  มาละสังขาร ต๋ามก๋าลโลกข้อง เหลือแต่ทำนอง เล่าไว้

  ผลงานก๋านเขียน โลกเตียนสืบไซร้ จดจ๋ำจื่อได้ “ศรีทวน”

  อิดมานักแล้ว ดวงแก้วจุ่งหวน นำพ่อศรีทวน สุขเหนือโลกหล้า

 ด้วยจิตคารวะ อาลัยยิ่ง ....หนานชาติ 10 มิ.ย. 54    

....

แมวจ่างซ่อนเน้อ เสือจ่างซ่อนหนัง เขี้ยวเล็บเก็บบัง ใจ๊ยังเมื่อต้อง

ยามถึงตี่หมาย จั๊กลายออกป้อง ถึงฮู้หันกอง ซ่อนนั้น

กวีหนุ่มสาว ถึงคราวเลื่อนจั้น บ่ดีเก็บอั้น เนอนาย

เขียนกั๋นมาซ้อง บ่ต้องหนีหาย จ่วยกั๋นสืบลาย สายฅ่าวยาวสร้าง

10 มิ.ย.54

.......

ผ่อข่าวช่วงเจ๊า เล่าน่าใจ๋หาย ตำรวจทลาย หมู่ขายยาบ้า

ยับได้หลายแสน ชายแดนบ้านข้า มันนักแต๊นา พี่น้อง

ที่บ้าสับสน คือคนเล่าร้อง บ้าเงินบ้าย้อง ใค่มี

เลยไปขายก๊า บ้าเป๋นเศรษฐี บ้ามั่งบ้ามี เป๋นผียาบ้า

13 มิ.ย.54